ജിദ്ദ: ഹജ്ജ്, ഉംറ തീര്ഥാടകരുടെ സുപ്രധാന ബയോമെട്രിക് വിവരങ്ങള് അതത് രാജ്യങ്ങളില് രേഖപ്പെടുത്തുന്ന സംവിധാനം തുനീഷ്യയിലും ആരംഭിച്ചു.
സ്മാര്ട്ട് ഫോണുകള് വഴി സ്വയം ബയോമെട്രിക് വിവരങ്ങള് രജിസ്റ്റര് ചെയ്യുന്നതിനുള്ള ‘സൗദി വിസ ബയോ സ്മാര്ട്ട് ആപ്ലിക്കേഷെന്റ’ ഉദ്ഘാടനം തുനീഷ്യയിലെ സൗദി അംബാസഡര് ഡോ. അബ്ദുല് അസീസ് ബിന് അലി അല്സാഗര് നിര്വഹിച്ചു.
തുനീഷ്യന് മതകാര്യ മന്ത്രി ഡോ. ഇബ്രാഹിം ചൈബി, വിദേശകാര്യ മന്ത്രാലയങ്ങളിലെയും ഹജ്ജ്, ഉംറ മന്ത്രാലയങ്ങളിലെയും പ്രതിനിധികളും സന്നിഹിതരായിരുന്നു.
തീര്ഥാടകര്ക്ക് അതത് രാജ്യങ്ങളില്നിന്ന് ബയോമെട്രിക് വിവരങ്ങള് രേഖപ്പെടുത്തുന്ന സംവിധാനം വിവിധ രാജ്യങ്ങളില് സൗദി പാസ്പോര്ട്ട്, ഹജ്ജ്, ഉംറ മന്ത്രാലയവും വിദേശകാര്യാലയവും ചേര്ന്ന് നടപ്പാക്കിവരുകയാണ്.
ഇതിനകം ബംഗ്ലാദേശ് ഉള്പ്പെടെ ചില രാജ്യങ്ങളില് ഇത് നടപ്പാക്കിയിട്ടുണ്ട്. സൗദി അറേബ്യ നടപ്പാക്കിയ ലോകത്തെ ആകര്ഷിച്ചിട്ടുള്ള മികച്ച പദ്ധതികളിലൊന്നാണ് ഈ ആപ്ലിക്കേഷനെന്ന് തുനീഷ്യന് മതകാര്യവകുപ്പ് മന്ത്രി പറഞ്ഞു. ഇത് തീര്ഥാടകര്ക്കുള്ള ബുദ്ധിമുട്ട് ലഘൂകരിക്കും. കാലത്തിനൊത്ത് സഞ്ചരിക്കുന്ന നടപടിയാണിതെന്നും അദ്ദേഹം ചൂണ്ടിക്കാട്ടി.
തീര്ഥാടകര്ക്ക് സേവനം ചെയ്യാനുള്ള എല്ലാ സാധ്യതകളും സൗദി ഭരണകൂടം പ്രയോജനപ്പെടുത്തിയിട്ടുണ്ടെന്നും തുനീഷ്യന് മന്ത്രി പറഞ്ഞു. സുപ്രധാന ബയോമെട്രിക് സവിശേഷതകള് സ്വയം നടപ്പാക്കാന് തുടങ്ങുന്ന രാജ്യങ്ങളില് തുനീഷ്യയെ തെരഞ്ഞെടുത്തത് ആ രാജ്യവുമായുള്ള സൗദി അറേബ്യയുടെ ബന്ധത്തിെന്റ ആഴം എടുത്തുകാണിക്കുന്നതാണെന്ന് സൗദി അംബാസഡര് പറഞ്ഞു. വിഷന് 2030-െന്റ ഭാഗമാണ് ഈ ആപ്ലിക്കേഷന്. ഇതിലൂടെ ഇരുഹറമുകളുടെ സേവനത്തില് സൗദി അറേബ്യ ഏറ്റവും മാന്യവും പരിഷ്കൃതവുമായ പ്രതിച്ഛായ പ്രതിഫലിപ്പിക്കുകയാണ്. ഇതോടെ തുനീഷ്യയിലെ ഹജ്ജ്, ഉംറ വിസകള്ക്കുള്ള അപേക്ഷകര്ക്ക് വിസ വിതരണ കേന്ദ്രങ്ങള് സന്ദര്ശിക്കാതെ സ്മാര്ട്ട് ഫോണുകള് വഴി അവരുടെ ബയോമെട്രിക് വിവരങ്ങള് രജിസ്റ്റര് ചെയ്യാന് സാധിക്കുമെന്നും വിസകള് ഇ-സംവിധാനം വഴി നേടാനാകുമെന്നും അംബാസഡര് പറഞ്ഞു. സൗദിയിലേക്ക് പ്രവേശിക്കുമ്ബോള് ബയോമെട്രിക് വിവരങ്ങള് വീണ്ടും രജിസ്റ്റര് ചെയ്യേണ്ട ആവശ്യമില്ല. ഇത് പ്രവേശന കവാടങ്ങളില് നടപടി എളുപ്പമാക്കും. സ്മാര്ട്ട് ഫോണുകള് വഴി വിസ അപേക്ഷകര്ക്കായി സുപ്രധാന ഫീച്ചറുകളുടെ രജിസ്ട്രേഷന് ആദ്യമായി ഉപയോഗിക്കുന്ന രാജ്യമാണ് സൗദി അറേബ്യയെന്നും സൗദി അംബാസഡര് പറഞ്ഞു.