തൊടുപുഴ: കഞ്ചാവ് ഉള്‍പ്പെടെ ലഹരിക്കേസുകളില്‍ പിടികൂടുന്നവരുടെ എണ്ണം ഇടുക്കി ജില്ലയില്‍ വര്‍ധിക്കുന്നു.
കഞ്ചാവ്, ഹഷീഷ്, ചരസ് എന്നിവ കൂടാതെ പുതുതലമുറ ലഹരികളുടെ ഉപയോഗവും ജില്ലയില്‍ കൂടിവരുകയകാണെന്ന് കണക്കുകള്‍ വ്യക്തമാക്കുന്നു.
ഒന്നരമാസത്തിനിടെ അബ്കാരി -എന്‍.ഡി.പി.എസ് കേസുകളിലായി 170പേരാണ് ജില്ലയില്‍ പിടിയിലായത്. മാര്‍ച്ച്‌ ഒന്ന് മുതല്‍ ഏപ്രില്‍ 17വരെ നടത്തിയ പരിശോധകളില്‍ 217കേസുകളില്‍നിന്നാണ് 170 പ്രതികളെ പിടികൂടിയത്.
ഇവരില്‍നിന്ന് 11കിലോ കഞ്ചാവും 446 ലിറ്റര്‍ ഇന്ത്യന്‍ നിര്‍മിത വിദേശമദ്യവും 40 ലിറ്റര്‍ വിദേശമദ്യവും പിടികൂടി. കൂടാതെ സ്പിരിറ്റ്-280 ലിറ്റര്‍, ചാരായം -17 ലിറ്റര്‍, കോട- 1340 ലിറ്റര്‍, എം.ഡി.എം.എ ഒന്നരഗ്രാം, ഒമ്ബത് കഞ്ചാവ് ചെടി, നാല് ഗ്രാം ചരസ്, 18 ഗ്രാം ലഹരി ടാബ്ലെറ്റ് എന്നിവയാണ് പിടിച്ചെടുത്തത്. അടുത്തിടെ ജില്ലയില്‍ പരിശോധന ശക്തമാക്കിയ സാഹചര്യത്തിലാണ് കേസുകള്‍ വര്‍ധിച്ചതെന്ന് എക്സൈസ് അധികൃതര്‍ ചൂണ്ടിക്കാട്ടുന്നു.
സമീപ കാലത്തായി യുവാക്കളെ ലക്ഷ്യംവെച്ച്‌ കഞ്ചാവും മയക്കുമരുന്നും എത്തിച്ചുനല്‍കുന്ന സംഘങ്ങള്‍ ജില്ലയുടെ പല മേഖലകളിലും പ്രവര്‍ത്തിക്കുന്നതായാണ് സൂചന. ആന്ധ്ര, തമിഴ്‌നാട് എന്നിവിടങ്ങളില്‍നിന്ന് അതിര്‍ത്തി കടത്തി എത്തിക്കുന്ന മയക്കുമരുന്ന് ചില്ലറ വില്‍പനക്കാര്‍ക്ക് എത്തിച്ചുനല്‍കാന്‍ വന്‍തോതില്‍ ഇടനിലക്കാരും പ്രവര്‍ത്തിക്കുന്നുണ്ട്.
കഞ്ചാവ് ചെറുപൊതികളാക്കിയാണ് വില്‍പന. നഗരത്തില്‍ കഞ്ചാവ് കച്ചവടം നടത്തുന്ന സംഘങ്ങള്‍ രാത്രിയോടെ പല മേഖലകളിലും തമ്ബടിക്കുകയാണ്. പൊലീസിന്‍റെ നിരീക്ഷണം കാര്യമായെത്താത്ത മേഖലകളിലാണ് ഇവരുടെ ഇടപാടുകള്‍. അടുത്തിടെ തൊടുപുഴ മേഖലയിലടക്കം ലഹരിവില്‍പന വ്യാപകമായിട്ടുണ്ട്.
കഞ്ചാവടക്കമുള്ള ലഹരി വസ്തുക്കളാണ് തൊടുപുഴ മേഖലയില്‍നിന്ന് പിടികൂടുന്നവയില്‍ അധികവും. കേസുകള്‍ വര്‍ധിച്ചതോടെ പൊലീസും എക്സൈസും ജാഗ്രതയിലാണ്. സിറപ്പുകളും ലഹരികലര്‍ന്ന ഗുളികകളും വില്‍പന നടത്തുന്ന സംഘങ്ങളും സജീവമാണെന്നാണ് ലഭിക്കുന്ന വിവരം. അടുത്തിടെയായി ജില്ലയുടെ വിവിധ ഭാഗങ്ങളില്‍ അനേകം കഞ്ചാവ് ചെടികളും പൊലീസും എക്സൈസും കണ്ടെത്തി നശിപ്പിച്ചിട്ടുണ്ട്. ഉള്‍പ്രദേശങ്ങളില്‍ മാത്രമല്ല പുരയിടങ്ങളിലും കൃഷി വ്യാപകമായിട്ടുണ്ട്.
ഇടുക്കി ബ്രാന്‍ഡിന് ആവശ്യക്കാരുള്ളതിനാല്‍ മറ്റ് സംസ്ഥാനങ്ങളില്‍നിന്ന് ഇടുക്കിയിലെത്തിച്ച്‌ കഞ്ചാവ് കൈമാറുന്ന സംഭവവും വ്യാപകമാണ്. ഇതുകൂടാതെ നിരോധിത പുകയില ഉല്‍പന്നങ്ങളും വന്‍തോതില്‍ എത്തുന്നുണ്ട്. ലഹരിവസ്തുക്കളുടെ കടത്തും വ്യാജമദ്യ വിപണനവും തടയാന്‍ വരും ദിവസങ്ങളിലും പരിശോധന ശക്തമായി തുടരാനാണ് എക്സൈസിന്‍റെ തീരുമാനം.
