കുറ്റ്യാടി: വേളത്തെ 200 ഹെക്ടര്‍ പാടത്ത് കതിരണി പദ്ധതിയുമായി ജില്ല പഞ്ചായത്ത്. പദ്ധതിയുടെ മുന്നോടിയായി വയലുകളെപ്പറ്റി പഠിക്കാനായി പ്രസിഡന്‍റ് ഷീജ ശശിയുടെ നേതൃത്വത്തില്‍ മെംബര്‍മാരും ഉദ്യോഗസ്ഥരും പാടശേഖരം സന്ദര്‍ശിച്ചു.
കര്‍ഷകരെയും പാഠശേഖരസമിതി അംഗങ്ങളെയും നേരില്‍ കണ്ട് വയലിന്റെ അവസ്ഥയെ പറ്റി സംഘം ചോദിച്ചറിച്ചു.
200 ഹെക്ടര്‍ വയലില്‍ പകുതിയോളം സ്ഥലത്ത് മാത്രമാണ് കൃഷി നടക്കുന്നത്. ചിലയിടങ്ങളില്‍ വെള്ളമില്ലാത്തതിനാലും മറ്റു ചിലയിടങ്ങളില്‍ വെള്ളക്കെട്ടായതും കൃഷിക്ക് പ്രതിസന്ധി സൃഷ്ടിക്കുന്നുണ്ട്. പഞ്ചായത്തിലെ മുഴുവന്‍ വയലിലും കൃഷി ഇറക്കാവുന്ന രീതിയിലാണ് കതിരണി പദ്ധതി നടപ്പിലാക്കാന്‍ ഉദ്ദേശിക്കുന്നതെന്ന് പ്രസിഡന്‍റ് ഷീജ ശശി പറഞ്ഞു. പാഠശേഖര സമിതികളെയും കൃഷിക്കാരെയും ഉള്‍പ്പെടുത്തിയാണ് പുതിയ പദ്ധതി നടപ്പിലാക്കുക. ഇതുവഴി ഉല്‍പാദനം വര്‍ധിപ്പിക്കുകയാണ് ലക്ഷ്യമെന്നും അവര്‍ വ്യക്തമാക്കി.സ്ഥിരംസമിതി ചെയര്‍മാന്‍ പി. സുരേന്ദ്രന്‍, മെംബര്‍ അംഗം സി.എം. യശോദ എന്നിവരും അനുഗമിച്ചു.
