അറാര്‍: പെരുന്നാള്‍ ആഘോഷത്തോടനുബന്ധിച്ച്‌ വടക്കന്‍ സൗദി നഗരമായ അറാറില്‍ കുതിരപ്പട മാര്‍ച്ച്‌ നടന്നു.
മാനവ വിഭവശേഷി, സാമൂഹിക വികസന മന്ത്രാലയത്തിന്റെ നോര്‍ത്തേണ്‍ ബോര്‍ഡേഴ്‌സ് റീജനല്‍ ബ്രാഞ്ചിന്റെ ആഭിമുഖ്യത്തിലാണ് സംഘടിപ്പിച്ചത്.
അറബ് യുവാക്കളെ കുതിരപ്പടയിലേക്ക് ആകര്‍ഷിക്കാനും കുതിരപ്പടയിലെ അംഗങ്ങളെ പ്രോത്സാഹിപ്പിക്കുന്നതിനുവേണ്ടി നടത്തിയ പ്രദര്‍ശനത്തിന് സുരക്ഷാ പട്രോളിങ്ങുകളുടെയും സൗദി റെഡ് ക്രസന്‍റ് അതോറിറ്റിയുടെ പ്രാദേശിക ബ്രാഞ്ചിന്റെയും സഹകരണം ഉണ്ടായിരുന്നു. ദേശീയ പാരമ്ബര്യങ്ങളില്‍ അഭിമാനിക്കുന്ന ഒരു തലമുറയില്‍ ദേശീയ സ്വത്വം വളര്‍ത്താനും ജനകീയ പൈതൃകത്തിന്റെ മൂല്യം പ്രോത്സാഹിപ്പിക്കാനും ഇത്തരം പ്രദര്‍ശന പരിപാടികള്‍ സഹായിക്കുമെന്ന് മേഖലയിലെ മന്ത്രാലയത്തിന്റെ ബ്രാഞ്ച് ഡയറക്ടര്‍ ജനറല്‍ ഖാലിദ് അല്‍ റുമൈഖാനി പറഞ്ഞു. രാജ്യത്തിന്റെ സ്വത്വത്തിന്റെയും സംസ്‌കാരത്തിന്റെയും പൈതൃകത്തിന്റെയും അവിഭാജ്യ ഘടകമായ കുതിരപ്പട സൗദിയുടെ ചരിത്രത്തില്‍ ഏറെ മൂല്യവും പ്രാധാന്യവും നല്‍കുന്നതാണെന്ന് അല്‍-റുമൈഖാനി പറഞ്ഞു. കുതിരസവാരിയുടെ മേഖലയില്‍ കൂടുതല്‍ വികസനത്തിന് പരിപാടി ഏറെ ഫലം ചെയ്യുമെന്ന് പ്രതീക്ഷിക്കുന്നതായി സൗദി പ്രസ് ഏജന്‍സി റിപ്പോര്‍ട്ട് ചെയ്തു.
