ദോഹ: ഖത്തര്‍ ഫിഫ ലോകകപ്പിന്‍റെ ഔദ്യോഗിക പോസ്റ്റര്‍ ലണ്ടനിലെ ദി ഡിസൈന്‍ മ്യൂസിയത്തില്‍ പ്രദര്‍ശിപ്പിച്ചു.
മ്യൂസിയത്തിലെ ‘ഫുട്ബാള്‍: ഡിസൈനിങ് ദി ബ്യൂട്ടിഫുള്‍ ഗെയിം’ എക്സിബിഷനിലാണ് പോസ്റ്റര്‍ ഉള്‍പ്പെടുത്തിയത്. മ്യൂസിയത്തില്‍ നടന്ന പ്രകാശന ചടങ്ങില്‍ പോസ്റ്റര്‍ രൂപകല്‍പന ചെയ്ത ബുഥൈന അല്‍ മുഫ്ത, ഫിഫ ലോകകപ്പ് ഖത്തര്‍ 2022 അംബാസഡറും ഇംഗ്ലീഷ് ഫുട്ബാള്‍ ഇതിഹാസവുമായ ഡേവിഡ് ബെക്കാം എന്നിവര്‍ പങ്കെടുത്തു.
ലോകകപ്പിന്‍റെ പ്രധാന പോസ്റ്റര്‍ രൂപകല്‍പന ചെയ്തതിന് പിന്നിലെ പ്രചോദനം ബുഥൈന അല്‍ മുഫ്ത വിശദീകരിക്കുകയും കൈയൊപ്പ് ചാര്‍ത്തിയ പോസ്റ്റര്‍ മ്യൂസിയത്തിന് സമ്മാനിക്കുകയും ചെയ്തു.
ലണ്ടനിലെ പ്രശസ്തമായ ഡിസൈന്‍ മ്യൂസിയത്തില്‍ തന്‍റെ പോസ്റ്റര്‍ പ്രദര്‍ശനത്തിന് വെച്ചതില്‍ ഏറെ അഭിമാനിക്കുന്നതായും കലാ ജീവിതത്തിലെ ഏറ്റവും സന്തോഷകരമായ നിമിഷങ്ങളിലൊന്നാണിതെന്നും അല്‍ മുഫ്ത പറഞ്ഞു. പ്രധാന പോസ്റ്ററിനൊപ്പം മറ്റു ഏഴ് ചിത്രങ്ങളും മ്യൂസിയത്തില്‍ പ്രദര്‍ശിപ്പിച്ചിട്ടുണ്ട്. ഖത്തറിന്‍റെ ചരിത്രത്തിലെ സുപ്രധാന നാഴികക്കല്ലാകുന്ന ലോകകപ്പിന്‍റെ ഔദ്യോഗിക പോസ്റ്ററുമായി ഖത്തറിനെ പ്രതിനിധീകരിക്കുന്ന നിമിഷങ്ങളെ വിശേഷിപ്പിക്കാന്‍ വാക്കുകളില്ലെന്നും ജീവിതത്തിലെ ഏറ്റവും വലിയ ആദരവുകളിലൊന്നാണിതെന്നും അവര്‍ വ്യക്തമാക്കി.
ലണ്ടനിലെ ഡിസൈന്‍ മ്യൂസിയം സന്ദര്‍ശിക്കാന്‍ സാധിച്ചതിലും ലോകകപ്പ് ഔദ്യോഗിക പോസ്റ്ററും പോസ്റ്റര്‍ രൂപകല്‍പന ചെയ്തവരെ നേരില്‍ കാണാന്‍ സാധിച്ചതിലും സന്തോഷം രേഖപ്പെടുത്തുന്നുവെന്ന് ഇംഗ്ലീഷ് ഫുട്ബാള്‍ ഇതിഹാസം ഡേവിഡ് ബെക്കാം പറഞ്ഞു. മൂന്ന് ലോകകപ്പുകളില്‍ ഇംഗ്ലണ്ടിനെ പ്രതിനിധീകരിച്ച താരം കൂടിയാണ് ബെക്കാം. 1930 മുതല്‍ 2018 വരെയുള്ള ഫിഫ ലോകകപ്പ്, വനിത ലോകകപ്പ് ഫുട്ബാള്‍ പോസ്റ്ററുകള്‍ ഡിസൈന്‍ മ്യൂസിയത്തിലെ ഫുട്ബാള്‍ പ്രദര്‍ശനത്തില്‍ നേരത്തെ പ്രദര്‍ശിപ്പിച്ചിരുന്നു. 2022ലെ ഔദ്യോഗിക പോസ്റ്ററും ഒപ്പമുള്ള ഏഴ് പോസ്റ്ററുകളും ഈ പ്രദര്‍ശനത്തിലെ ഏറ്റവും പുതിയ ഇനങ്ങളാണ്. ലുസൈല്‍ സ്റ്റേഡിയം, അല്‍ ജനൂബ് സ്റ്റേഡിയം എന്നിവയുടെ മാതൃകകളും ഡിസൈന്‍ മ്യൂസിയത്തിലുണ്ട്.
മിഡിലീസ്റ്റിലും അറബ് ലോകത്തുമായി ആദ്യമെത്തുന്ന ഫിഫ ലോകകപ്പ് ഫുട്ബാള്‍ ടൂര്‍ണമെന്‍റിന്‍റെ ഔദ്യോഗിക പോസ്റ്റര്‍ ജൂണ്‍ 15ന് ഹമദ് രാജ്യാന്തര വിമാനത്താവളത്തില്‍ നടന്ന ചടങ്ങിലാണ് പ്രകാശനം ചെയ്തത്.
ഖത്തറിലും അറബ് ലോകത്തും ഫുട്ബാള്‍ ആഘോഷങ്ങളുടെ ഭാഗമായി അറബികളുടെ പാരമ്ബര്യ തലപ്പാവ് വലിച്ചെറിയുന്നതാണ് പോസ്റ്ററില്‍ രൂപകല്‍പന ചെയ്തിരിക്കുന്നത്.
ഓരോ പോസ്റ്ററും ആഘോഷത്തെയും ഖത്തറിലെ ഫുട്ബാള്‍ ആവേശത്തെയും ആരാധനയെയുമാണ് സൂചിപ്പിക്കുന്നത്. പ്രധാന പോസ്റ്ററിലുള്ളത് പരമ്ബരാഗത തലപ്പാവായ ഇഗല്‍, ഗുത്റ എന്നിവയാണ്.
