ദുബൈ: ത്യാഗത്തിന്‍റെയും സമര്‍പ്പണത്തിന്‍റെയും ഇതിഹാസഗാഥകളുടെ സ്മരണയോടെ ഗള്‍ഫ് രാജ്യങ്ങള്‍ ബലി പെരുന്നാളിന്‍റെ വലിയ സന്തോഷത്തില്‍.
എല്ലാ ഗള്‍ഫ് രാജ്യങ്ങളും ഒരുമിച്ച്‌ ഈദുല്‍ അദ്ഹ ആഘോഷിക്കുന്ന ദിനത്തില്‍ മലയാളികളടക്കമുള്ള പ്രവാസി സമൂഹവും പെരുന്നാളിന്‍റെ പുണ്യവും ആഹ്ലാദവും പങ്കുവെച്ചു. പുലര്‍ച്ചെ ഈദ്ഗാഹുകളിലും മസ്ജിദുകളിലും നടന്ന പെരുന്നാള്‍ നമസ്കാരത്തില്‍ ആയിരങ്ങള്‍ അണിനിരന്നു. മാനവിക ഐക്യത്തിന്‍റെയും സമാധാനത്തിന്‍റെയും പതാകവാഹകരാകണമെന്ന ആഹ്വാനമാണ് പെരുന്നാള്‍ ഖുതുബയില്‍ നിറഞ്ഞുനിന്നത്. പെരുന്നാള്‍ നമസ്കാരത്തിനുശേഷം വിശുദ്ധ ബലികര്‍മ്മത്തിനും തുടക്കമായി. ഇനി സുഹൃത്തുക്കളെയും ബന്ധുക്കളെയും സന്ദര്‍ശിക്കുന്നതിന്‍റെയും വിനോദസഞ്ചാര കേന്ദ്രങ്ങളിലേക്ക് പോകുന്നതിന്‍റെയും തിരക്കിലേക്ക് പ്രവാസി സമൂഹം തിരിയും.
കോവിഡ് നിയന്ത്രണങ്ങളില്‍ ചുരുങ്ങിപ്പോയ കഴിഞ്ഞ രണ്ട്വര്‍ഷത്തെ ഹജ്ജിനുശേഷം ലക്ഷങ്ങള്‍ എത്തിച്ചേര്‍ന്ന വിശ്വമഹാസംഗമത്തിന്‍റെ ആവേശം കൂടി ചേര്‍ന്നാണ് ഇത്തവണ പെരുന്നാളെത്തിയത്. സൗദി അറേബ്യ, യു.എ.ഇ, ഒമാന്‍, ഖത്തര്‍, കുവൈത്ത്, ബഹ്റൈന്‍ എന്നിവിടങ്ങളിലെല്ലാം കോവിഡാനന്തര പെരുന്നാളിന്‍റെ ആവേശം പ്രകടമാണ്. കഴിഞ്ഞ രണ്ടു വര്‍ഷങ്ങളിലെ പോലെ കോവിഡ് ജാഗ്രത കൈവിടാതെയാണ് സ്വദേശികളും വിദേശികളും ഒരേ മനസ്സോടെ പെരുന്നാള്‍ ആഘോഷിക്കുന്നത്. കോവിഡ് ജാഗ്രത പാലിച്ചുവേണം ആഘോഷങ്ങളെന്ന് എല്ലാ ഗള്‍ഫ് രാജ്യങ്ങളിലും അധികൃതര്‍ ആവശ്യപ്പെട്ടിരുന്നു. ഇതനുസരിച്ചാണ് ഈദ്ഗാഹുകളും മറ്റ് ഒത്തുചേരലുകളും നടന്നത്. എല്ലായിടത്തും പ്രവാസി കൂട്ടായ്മകള്‍ പലവിധ പരിപാടികള്‍ ഇത്തവണ ഒരുക്കിയിട്ടുണ്ട്.
പെരുന്നാള്‍ അവധി ദിനങ്ങളായതിനാല്‍ എല്ലാ ഗള്‍ഫ് രാജ്യങ്ങളിലെയും വിനോദസഞ്ചാര കേന്ദ്രങ്ങളില്‍ തിരക്ക് വര്‍ധിച്ചിട്ടുണ്ട്. റോഡ് അപകടങ്ങള്‍ ഒഴിവാക്കുന്നതിന് നിശ്ചയിച്ച വേഗപരിധികള്‍ പാലിക്കണമെന്നും അധികൃതര്‍ ആവശ്യപ്പെട്ടിട്ടുണ്ട്. ആഘോഷങ്ങള്‍ക്ക് സുരക്ഷ വര്‍ധിപ്പിക്കാനായി എല്ലാ ഗള്‍ഫ് രാജ്യങ്ങളിലും റോഡുകളിലും മാര്‍ക്കറ്റുകളിലും വാണിജ്യ മേഖലകളിലും പട്രോളിങ് ശക്തമാക്കിയിട്ടുണ്ട്.
