ന്യൂഡല്ഹി | കൊല്ലം ആയൂരില് നീറ്റ് പരീക്ഷയ്ക്കെത്തിയ വിദ്യാര്ഥിനിയെ അടിവസ്ത്രമഴിപ്പിച്ച് പരിശോധിച്ചതില് അടിയന്തര അന്വേഷണത്തിന് ഉത്തരവിട്ട് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് .സംഭവത്തില് വിദ്യാഭ്യാസ അഡീഷനല് സെക്രട്ടറിയോട് മന്ത്രി റിപ്പോര്ട്ട് തേടി.
കേരളത്തില് നിന്നുള്ള ലോക്സഭാംഗങ്ങള് വിഷയത്തില് അടിയന്തരപ്രമേയത്തിന് നോട്ടിസ് നല്കിയിരുന്നു. ഇതിന് പിന്നാലെയാണ് മന്ത്രിയുടെ ഇടപെടല്.
എന്നാല് അടിവസ്ത്രം അഴിപ്പിച്ച് പരിശോധിച്ചെന്ന് രേഖാമൂലം പരാതി ലഭിച്ചില്ലെന്നാണ് നാഷണല് ടെസ്റ്റിങ് ഏജന്സിയുടെ വിശദീകരണം. അടിവസ്ത്രം അഴിപ്പിച്ചുള്ള പരിശോധന അനുവദനീയമല്ല. എന്ടിഎ ഡ്രസ് കോഡില് ഇത്തരം നടപടികള് നിര്ദേശിച്ചിട്ടില്ലെന്നും അധികൃതര് വ്യക്തമാക്കി.അതിനിടെ അടിവസ്ത്രം അഴിപ്പിച്ചതുമായി ബന്ധപ്പെട്ട് വിദ്യാര്ഥിനികള് നല്കിയ പരാതിയില് പോലീസ് അന്വേഷണം ആരംഭിച്ചു. സംഭവം നടന്ന ആയൂര് മാര്ത്തോമ്മാ ഇന്സ്റ്റിറ്റ്യൂട്ട് ഓഫ് ഇന്ഫര്മേഷന് ആന്ഡ് ടെക്നോളജിയില് എത്തിയ പോലീസ് സിസിടിവി ദൃശ്യങ്ങള് പരിശോധിച്ചു.