കുവൈത്ത് സിറ്റി: അറബ് ലീഗിന്റെ ചട്ടക്കൂടില്‍ അറബ് രാജ്യങ്ങള്‍ തമ്മിലുള്ള ഉഭയകക്ഷി-ബഹുരാഷ്ട്ര നിയമ, ജുഡീഷ്യല്‍ സഹകരണം വര്‍ധിപ്പിക്കുന്നതിന് കുവൈത്ത് നീതിന്യായ മന്ത്രാലയത്തിന് താല്‍പര്യമുണ്ടെന്ന് നീതിന്യായ മന്ത്രാലയം അണ്ടര്‍ സെക്രട്ടറി ഒമര്‍ അല്‍ ഷര്‍ഖാവി.
മൊറോക്കോയിലെ അറബ് നീതിന്യായ മന്ത്രിമാരുടെ കൗണ്‍സിലിന്റെ 38ാമത് സെഷനില്‍ പങ്കെടുത്തശേഷം പ്രതികരിക്കുകയായിരുന്നു അദ്ദേഹം.
സംയുക്ത അറബ് സഹകരണ സംവിധാനങ്ങള്‍ ഏകീകരിക്കാനുള്ള താല്‍പര്യം കുവൈത്ത് പ്രകടിപ്പിക്കുന്നു. പ്രധാനമായും സംഘടിത കുറ്റകൃത്യങ്ങള്‍, തീവ്രവാദം എന്നിവക്കെതിരെ പോരാടുന്നതില്‍ -അല്‍ ഷര്‍ഖാവി പറഞ്ഞു. കുറ്റകൃത്യങ്ങള്‍, തീവ്രവാദം, മയക്കുമരുന്ന്, സൈബര്‍ സുരക്ഷ എന്നിവയെ അഭിമുഖീകരിക്കുന്നതിലും പ്രായോഗിക വശങ്ങള്‍ കൈമാറ്റം ചെയ്യാനും ഒരുമിച്ചുനില്‍ക്കേണ്ടതിന്റെ അനിവാര്യതയും അദ്ദേഹം എടുത്തുപറഞ്ഞു.
കുവൈത്ത് സിറ്റി: നിലവിലെ ദുഷ്‌കരമായ ആഗോള സാമ്ബത്തിക സാഹചര്യങ്ങളെ അറബ് രാജ്യങ്ങള്‍ സാമ്ബത്തിക ഏകീകരണത്തിലേക്ക് നയിക്കുന്ന അവസരങ്ങളാക്കി മാറ്റണമെന്ന് മൊറോക്കോയിലെ കുവൈത്ത് അംബാസഡര്‍ അബ്ദുല്ലത്തീഫ് അല്‍ യഹ്‌യ.
അറബ് ഇന്‍ഡസ്ട്രിയല്‍ ഡെവലപ്‌മെന്റ്, സ്റ്റാന്‍ഡേഡൈസേഷന്‍ ആന്‍ഡ് മൈനിങ് ഓര്‍ഗനൈസേഷന്‍ ചര്‍ച്ചയുടെ ഭാഗമായി ഔദ്യോഗിക മാധ്യമത്തോട് പ്രതികരിക്കുകയായിരുന്നു അദ്ദേഹം.
വ്യവസായിക മേഖലയെ പിന്തുണക്കുന്നതിനായി വിജ്ഞാനം, നവീകരണം, ഡിജിറ്റൈസേഷന്‍, ആര്‍ട്ടിഫിഷ്യല്‍ ഇന്റലിജന്‍സ് എന്നിവ അടിസ്ഥാനമാക്കിയുള്ള വ്യവസായങ്ങളെ പ്രോത്സാഹിപ്പിക്കേണ്ടതിന്റെ ആവശ്യകതയും അദ്ദേഹം വിശദീകരിച്ചു.
വാണിജ്യ വ്യവസായ മന്ത്രാലയത്തെ പ്രതിനിധാനം ചെയ്ത് കുവൈത്ത് പ്രതിനിധി സംഘത്തിന്റെ നേതൃത്വത്തില്‍ നടന്ന മന്ത്രിതല യോഗത്തില്‍ അംബാസഡര്‍
പങ്കെടുത്തു. അറബ് ഐക്യത്തിനും കുവൈത്ത് സര്‍ക്കാറിന്റെ പിന്തുണ അദ്ദേഹം അറിയിച്ചു.
