പഴയങ്ങാടി: പാപ്പിനിശ്ശേരി, പിലാത്തറ കെഎസ്ടിപി റോഡ് രാജ്യാന്തര നിലവാരമുളള റോഡായി ഉയര്ന്നപ്പോള് മാറിയതാണ് എരിപുരം കവലയുടെ മുഖവും.
നാല് റോഡുകള് കൂടി ചേരുന്ന കവല ഇന്ന് അപകടങ്ങളുടെ കേന്ദ്രമാണ്. ഒട്ടേറെ അപകടങ്ങളില് മനുഷ്യ ജീവന് പൊലിഞ്ഞു, നിരവധി പേര്ക്ക് പരുക്കേറ്റു.
മുന്പ് നാലു റോഡുകള് കൂടുന്ന ഇവിടെ വലിയ അപകടങ്ങള് ഒന്നും ഉണ്ടായിരുന്നില്ല. രാജ്യാന്തര നിലവാരത്തിലേക്ക് ഉയര്ന്നപ്പോള് ഇവിടെ വന്ന ട്രാഫിക് സര്ക്കിളിനു ചുറ്റുമുളള റോഡിന്റെ വീതി കുറയുകയായിരുന്നു. ട്രാഫിക് സര്ക്കിളിനു നടുവില് പൂന്തോട്ടം വന്നെങ്കിലും റോഡിന് വീതി വന്നില്ല.
അതുകൊണ്ട് തന്നെ വീതി കുറഞ്ഞതും കയറ്റിറക്കങ്ങള് രണ്ട് വശങ്ങളിലായി ഉളള എരിപുരം കവലയില് അപകടങ്ങള് വര്ധിച്ചു. എരിപുരം മുകളിലേക്ക് നടന്ന് പോകാന് പോലും റോഡിനരികില് സ്ഥലം ഇല്ല. ജീവന് പണയം വച്ചാണ് ഇതു വഴിയുളള യാത്ര.
സ്കൂളുകള്, കോളജ്, പഴയങ്ങാടി സബ് ട്രഷറി, ധനകാര്യ സ്ഥാപനങ്ങള് എന്നിവിടങ്ങളിലേക്ക് ബസിറങ്ങി ആളുകള് പോകേണ്ടത് നട പാത ഇല്ലാത്ത റോഡിലൂടെയാണ്. നിയന്ത്രണങ്ങള് ഇല്ലാതെ കെട്ടിട സമുച്ചയങ്ങള് ഉയര്ന്നത് റോഡ് വികസനത്തിന്റെ സാധ്യതകള് ഇല്ലാതാക്കി.