ദോഹ: ലോകകപ്പിന് വിരുന്നെത്തുന്ന സ്പാനിഷ് ടീമിന്‍റെ പരിശീലനവും താമസവുമെല്ലാം ഖത്തര്‍ യൂനിവേഴ്സിറ്റിക്കുള്ളില്‍.
ലയണല്‍ മെസ്സിയുടെ അര്‍ജന്‍റീന ടീമിന്‍റെ അയല്‍ക്കാരായാവും സെര്‍ജിയോ ബുസ്ക്വറ്റ്സിന്‍റെ ലാ റോഹയുടെയും തയാറെടുപ്പ്. സ്പാനിഷ് ഫുട്ബാള്‍ ഫെഡറേഷനാണ് തങ്ങളുടെ ലോകകപ്പ് ബേസ് ക്യാമ്ബ് സംബന്ധിച്ച്‌ ഔദ്യോഗിക പ്രഖ്യാപനം നടത്തിയത്.
ഖത്തര്‍ യൂനിവേഴ്സിറ്റിക്കുള്ളില്‍ ബേസ് ക്യാമ്ബ് അനുവദിക്കണമെന്ന അപേക്ഷ ഫിഫ അംഗീകരിച്ചതായി സ്പാനിഷ് സോക്കര്‍ ഫെഡറേഷന്‍ അറിയിപ്പില്‍ വ്യക്തമാക്കി.
സര്‍വകലാശാല കാമ്ബസിനകത്തെ രണ്ടു പരിശീലന മൈതാനങ്ങള്‍ ടീമിന് ഉപയോഗപ്പെടുത്താന്‍ കഴിയും. ഇതിനു പുറമെ, ജിംനേഷ്യം, ടെക്നിക്കല്‍ ഏരിയ, മീറ്റിങ് റൂം തുടങ്ങിയ രാജ്യാന്തര നിലവാരത്തിലുള്ള സൗകര്യങ്ങളും ടീമിനായുണ്ട്.
ദോഹ വിമാനത്താവളത്തില്‍നിന്ന് 28 കിലോമീറ്റര്‍ അകലെയുള്ള ബേസ് ക്യാമ്ബ് സ്റ്റേഡിയങ്ങളിലേക്ക് എളുപ്പത്തില്‍ എത്തിച്ചേരാന്‍ ഉള്‍പ്പെടെ സൗകര്യമാവുമെന്ന് അധികൃതര്‍ വിശദീകരിച്ചു.
കോച്ച്‌ ലൂയി എന്‍റിക്വെ, കോച്ചി സ്റ്റാഫ് എന്നിവരുടെ നിര്‍ദേശ പ്രകാരമാണ് ബേസ് ക്യാമ്ബ് കണ്ടെത്തിയതെന്ന് ഫെഡറേഷന്‍ അറിയിച്ചു. നവംബര്‍ 23ന് അല്‍ തുമാമ സ്റ്റേഡിയത്തില്‍ കോസ്റ്ററീകക്കെതിരെയാണ് സ്പെയിനിന്‍റെ ആദ്യ മത്സരം. 20 കിലോമീറ്ററാണ് ബേസ് ക്യാമ്ബില്‍നിന്നു സ്റ്റേഡിയത്തിലേക്കുള്ള ദൂരം. ജര്‍മനിയും ജപ്പാനുമാണ് ഗ്രൂപ്പിലെ മറ്റ് ടീമുകള്‍.
