ന്യൂഡല്ഹി: കണ്ണമ്മൂല സ്വദേശി സുനില് ബാബുവിനെ കൊലപ്പെടുത്തിയ കേസിലെ പ്രതി കാരി ബിനുവിന്റെ ജീവപര്യന്തം തടവ് റദ്ദാക്കണമെന്ന് ആവശ്യപ്പെട്ട് സമര്പ്പിച്ച ഹര്ജിയില് സുപ്രീം കോടതി നോട്ടീസ് അയച്ചു.
ജസ്റ്റിസുമാരായ ഹേമന്ത് ഗുപ്ത, സുധാന്ഷു ദുലിയ എന്നിവരടങ്ങിയ ബെഞ്ചാണ് സംസ്ഥാന സര്ക്കാരിന് നോട്ടീസ് അയച്ചത്. ശിക്ഷാ ഇളവ് സംബന്ധിച്ച് സുപ്രീം കോടതി അന്തിമ വിധി വരുന്നതുവരെ ഇടക്കാല ജാമ്യം അനുവദിക്കണമെന്ന ഹര്ജിയില് കോടതി സര്ക്കാരിന്റെ നിലപാട് ആരാഞ്ഞു. സുനില് ബാബു വധക്കേസിലെ അഞ്ചാം പ്രതിയാണ് കാരി ബിനു. ബിനുവിനെതിരെ ഗൂഡാലോചനക്കുറ്റം മാത്രമാണ് ചുമത്തിയിരിക്കുന്നതെന്ന് ബിനുവിന് വേണ്ടി ഹാജരായ സീനിയര് അഭിഭാഷകന് രാജേഷ് പാണ്ഡേ, അഭിഭാഷകരായ എം.കെ. അശ്വതി, മനോജ് സെല്വരാജ് എന്നിവര് സുപ്രീം കോടതിയില് ചൂണ്ടിക്കാട്ടി. അതിനാല് ജീവപര്യന്തം ശിക്ഷ റദ്ദാക്കണമെന്നും അഭിഭാഷകര് ആവശ്യപ്പെട്ടു. ഇതിന് പിന്നാലെയാണ് കോടതി സര്ക്കാരിന്റെ നിലപാട് തേടിയത്.