ന്യൂഡൽഹി: ഹർനാസ് സന്ധുവിലൂടെ 21 വർഷത്തിന് ശേഷം വിശ്വസുന്ദരി കിരീടം ഇന്ത്യയ്‌ക്ക് ലഭിച്ചിരിക്കുകയാണ്. പഞ്ചാബിൽ നിന്നുള്ള 21കാരി ലോകത്തിന്റെ നെറുകയിൽ രാജ്യത്തിന് അഭിമാനമായി നിൽക്കുമ്പോൾ മത്സരത്തിൽ ഹർനാസ് അണിഞ്ഞ വേഷമാണ് ചർച്ചയാകുന്നത്. വിശ്വസുന്ദരി പട്ടം ലഭിച്ച ഹർനാസ് സന്ധുവണിഞ്ഞ വേഷത്തിന് പിന്നിലാരാണെന്നതാണ് സോഷ്യൽ മീഡിയയിൽ ഉയരുന്ന ചോദ്യം.
ഫൈനലിൽ പരാഗ്വയുടേയും ദക്ഷിണാഫ്രിക്കയുടേയും സുന്ദരികളെ പിന്തള്ളി ഹർനാസിന് ലഭിച്ച കിരീടനേട്ടത്തിന് പിന്നിൽ അവളെ അതിസുന്ദരിയായി നിർത്തിയ വസ്ത്രത്തിനും വലിയ പങ്കാണുള്ളത്. ഹർനാസ് അണിഞ്ഞ ഷിമ്മേരി ഗൗൺ ഡിസൈൻ ചെയ്തത് സൈഷ ഷിൻഡേ എന്ന ട്രാൻസ് വുമണാണ്. കിരീടമണിഞ്ഞുള്ള ഹർനാസിന്റെ ചിത്രങ്ങൾ സോഷ്യൻ മീഡിയയിൽ വൈറലാകുമ്പോൾ അവളുടെ വേഷത്തിന് പിന്നിൽ പ്രവർത്തിച്ചയാളെ ഇനി തിരഞ്ഞ് മടുക്കേണ്ട.
കരീന കപൂർ, ശ്രദ്ധാ കപൂർ, അനുഷ്‌ക ശർമ തുടങ്ങി നിരവധി ബോളിവുഡ് താരങ്ങളുടെ സ്‌റ്റൈലിസ്റ്റ് കൂടിയാണ് സൈഷ ഷിൻഡേ. സിനിമകളിൽ വസ്ത്രാലങ്കാരം നടത്തിയും മേഖലയിൽ ഉള്ളവർക്ക് സുപരിചിതയാണ് ഷിൻഡേ. വിശ്വസുന്ദരി കിരീടം നേടിയ ഹർനാസിന്റെ ചിത്രം ഇൻസ്റ്റഗ്രാമിൽ പങ്കുവെച്ച് സൈഷ സിൻഡേ തന്നെയാണ് ഇക്കാര്യം വെളിപ്പെടുത്തിയത്. ‘ഞങ്ങളത് ചെയ്തു’വെന്ന അടിക്കുറിപ്പോടെയാണ് സൈഷ ചിത്രം പങ്കുവെച്ചത്.
ഇന്ത്യക്കാരായ രണ്ട് പേർ മാത്രമായിരുന്നു ഹർനാസിന് മുമ്പ് വിശ്വസുന്ദരി പട്ടം നേടിയിട്ടുണ്ടായിരുന്നത്. 1194ൽ സുസ്മിതാ സെന്നും 2000ൽ ലാറ ദത്തയും. ശേഷം 2021ൽ ഇസ്രായേലിലെ എയ്ലെറ്റിൽ നടന്ന 70-ാമത് വിശ്വസുന്ദരി മത്സരത്തിലാണ് മൂന്നാമതായി ഒരു ഇന്ത്യക്കാരി കിരീടം നേടിയത്. 2020തിലെ വിശ്വസുന്ദരിയായ ആൻഡ്രിയ മെസ ഹർനാസിനെ കിരീടം ചൂടിക്കുകയായിരുന്നു. കർശന കൊറോണ നിയന്ത്രണങ്ങളോടെ 80 രാജ്യങ്ങളിൽ നിന്നുള്ളവർ മത്സരത്തിൽ പങ്കെടുത്തു.
2017ലാണ് ഹർനാസ് മോഡലിങ് രംഗത്തേക്ക് കടന്നു വരുന്നത്. പബ്ലിക് അഡ്മിനിസ്ട്രേഷനിൽ ബിരുദാനന്തര ബിരുദ വിദ്യാർത്ഥിനിയാണ് ഹർനാസ്. 2019ലെ മിസ് ഇന്ത്യ വിജയിയായ ഹർനാസ് രണ്ട് പഞ്ചാബ് ചിത്രങ്ങളിലും അഭിനയിച്ചിട്ടുണ്ട്.
