ദോഹ: വര്‍ഷം ദശലക്ഷത്തിലധികം ടണ്‍ പ്ലാസ്റ്റിക് മാലിന്യം പുനരുപയോഗയോഗ്യമാക്കി ഖത്തര്‍ എയര്‍ക്രാഫ്റ്റ് കാറ്ററിങ് കമ്ബനി (ക്യു.എ.സി.സി).
ഇതോടൊപ്പം ലക്ഷത്തിലധികം വസ്തുക്കളും മിച്ചം വന്ന ഭക്ഷണ വസ്തുക്കളും ലോകത്തിന്‍റെ വിവിധ ഭാഗങ്ങളിലെ അര്‍ഹര്‍ക്ക് നല്‍കി.
ഹാര്‍ഡ്ബോര്‍ഡ്, കെമിക്കല്‍ ഡ്രമ്മുകള്‍, പ്ലാസ്റ്റിക് കുപ്പികള്‍, ഉപയോഗിച്ച പേപ്പര്‍ അവശിഷ്ടം തുടങ്ങിയവ റീസൈക്ലിങ്ങിന് വിധേയമാക്കി. ഖത്തര്‍ എയര്‍വേസ് ഗ്രൂപ്പിന് കീഴിലുള്ള ക്യു.എ.സി.സി ഇതിലൂടെ തങ്ങളുടെ വാര്‍ഷിക മാലിന്യത്തിന്റെ അളവ് 1688 ടണ്‍ ആയി കുറച്ചു. ഖത്തര്‍ ആസ്ഥാനമായ ഖത്തര്‍ ചാരിറ്റി, ഹിഫ്സ് അല്‍ നഅ്മ എന്നിവയുമായി സഹകരിച്ച്‌ ലിനന്‍ ഇനങ്ങളായ കോട്ടണ്‍ ബ്ലാങ്കറ്റുകള്‍, മെത്തകള്‍ തുടങ്ങി 40,000ലധികം വസ്തുക്കളും മൂന്ന് ടണ്ണിലധികം ഭക്ഷണസാധനങ്ങളും ക്യു.എ.സി.സി വിതരണം ചെയ്തു.
തങ്ങള്‍ക്ക് പിന്തുണ നല്‍കുന്ന സമൂഹങ്ങളെ സഹായിക്കുന്നതിനും ഉപയോഗിച്ച വസ്തുക്കള്‍ റീസൈക്കിള്‍ ചെയ്ത് മാലിന്യം കുറക്കുന്നതിനും പ്രതിജ്ഞാബദ്ധരാണെന്ന് ഗ്രൂപ് സി.ഇ.ഒ അക്ബര്‍ അല്‍ ബാകിര്‍ പറഞ്ഞു. മാലിന്യം കുറക്കുന്നതിനും വസ്തുക്കള്‍ റീസൈക്കിള്‍ ചെയ്യുന്നതിനും നൂതന മാര്‍ഗം തേടുമെന്നും പരിസ്ഥിതി സുസ്ഥിരതയില്‍ ഒരു വര്‍ഷത്തെ ലക്ഷ്യം കമ്ബനി മറികടന്നെന്നും സീനിയര്‍ വൈസ് പ്രസിഡന്‍റ് സാഷ വോള്‍ഫര്‍ഡോര്‍ഫ് പറഞ്ഞു.
