കൊച്ചി: നടിയെ ആക്രമിച്ച കേസില് ജാമ്യം നല്കണമെന്നാവശ്യപ്പെട്ട് പ്രതിയായ പള്സര് സുനി നല്കിയ ഹരജി ഇന്ന് സുപ്രീംകോടതി പരിഗണിക്കും.
ജസ്റ്റിസ് അജയ് രസ്തോഗി അധ്യക്ഷനായ ബഞ്ചാണ് ജാമ്യാപേക്ഷ പരിഗണിക്കുക. തുടരന്വേഷണം നടക്കുന്ന സാഹചര്യത്തില് വിചാരണാ നടപടികള് വൈകാന് സാധ്യതയുണ്ടെന്ന് ചൂണ്ടിക്കാട്ടിയാണ് പള്സര് സുനി സുപ്രീം കോടതിയെ സമീപിച്ചത്.
കേസില് താനൊഴികെ എല്ലാ പ്രതികള്ക്കും ജാമ്യം ലഭിച്ചിട്ടുണ്ടെന്നും പള്സര് സുനി സമര്പ്പിച്ച ജാമ്യാപേക്ഷയില് പറയുന്നു. കേസില് തുടരന്വേഷണം നടക്കുന്നതിനാല് നിരവധി സാക്ഷികളെ വിസ്തരിക്കേണ്ടി വരും. അഞ്ച് വര്ഷമായി വിചാരണ തടവുകാരനായി കഴിയുന്നതിനാല് ജാമ്യം നല്കണമെന്നാണ് ആവശ്യം.
അതേസമയം, ഹൈകോടതിയില് നിന്ന് അനുകൂല വിധി വന്നതോടെ നടിയെ ആക്രമിച്ച കേസിലെ തുടരന്വേഷണം വേഗത്തിലാക്കാനൊരുങ്ങുകയാണ് ക്രൈംബ്രാഞ്ച്. ദിലീപിന്റെയും കൂട്ടുപ്രതികളുടെയും ഫോണിലെ വിവരങ്ങളുടെ പരിശോധന വേഗത്തിലാക്കാനാണ് അന്വേഷണ സംഘത്തിന്റെ നീക്കം. ദുരുദ്ദേശ്യത്തോടെ കെട്ടിച്ചമച്ച കേസാണിതെന്നും ബാലചന്ദ്രകുമാര് വെളിപ്പെടുത്തല് നടത്തുന്നതിന് മുമ്ബു മൂന്നു തവണ ബൈജു പൗലോസ് ഇയാളെ കണ്ടിരുന്നെന്നും അന്വേഷണത്തിന് നിര്ദേശം നല്കിയ ക്രൈംബ്രാഞ്ച് എ.ഡി.ജി.പി എസ്. ശ്രീജിത്ത് നല്ല ട്രാക്ക് റെക്കാര്ഡ് ഉള്ളയാളല്ലെന്നുമുള്ള ദിലീപിന്റെ വാദങ്ങളെല്ലാം കോടതി തള്ളിക്കളഞ്ഞിട്ടുണ്ട്.