കൊച്ചി: കൊച്ചിയിലെ ഫോറിന് പോസ്റ്റ് ഓഫീസ് വഴി വീണ്ടും ലഹരി കടത്താന് ശ്രമം. മുന്തിയ ഇനം കൊക്കെയ്നും എം.ഡി.എം.എയുമായി യുവാവ് പിടിയിലായി.
സിനിമാ മേഖലയിലുള്പ്പെടെ പ്രമുഖര്ക്ക് മാത്രം മയക്കുമരുന്ന് വില്പന നടത്തുന്ന കൊടുങ്ങല്ലൂര് ലോകമഹേശ്വരം വടക്കനോളില് വീട്ടില് ജാസിം നിസാം (29) ആണ് അറസ്റ്റിലായത്. നെതര്ലന്ഡില് നിന്ന് ഇയാള് വരുത്തിച്ച പാഴ്സലില് നിന്ന് 2896.8 മില്ലി ഗ്രാം എം.ഡി.എം.എയും 9881.8മില്ലി ഗ്രാം കൊക്കെയ്നും പിടിച്ചെടുത്തു. സൗണ്ട് എന്ജിനീയറായ ഇയാളുടെ വീട്ടില് നടത്തിയ പരിശോധനയില് കഞ്ചാവ് വലിക്കാന് ഉപയോഗിക്കുന്ന മൂന്ന് ക്രഷറുകള്, ഹുക്ക, പേപ്പര് എന്നിവ കണ്ടെടുത്തു. ഇയാള് നേരത്തേയും പാഴ്സല് എത്തിച്ചതായി സ്ഥിരികരിച്ചിട്ടുണ്ട്. ജാസിമില് നിന്ന് ലഹരിമരുന്ന് വാങ്ങിയ നിരവധിപ്പേര് എക്സൈസ് നിരീക്ഷണത്തിലാണ്. ഇവരെ ചോദ്യം ചെയ്യും. കേസ് പ്രത്യേക സംഘം അന്വേഷിച്ചേക്കും.
രണ്ട് ദിവസം മുമ്ബാണ് ഫോറിന് പോസ്റ്റ് ഓഫീസില് ജാസിമിന്റെ പേരില് പാഴ്സല് എത്തിയത്. സംശയം തോന്നിയ ഉദ്യോഗസ്ഥര് വിവരം എക്സൈസിന് കൈമാറി. മൂന്ന് കവറുകളില് എം.ഡി.എം.എയും ഒരു കവറില് കൊക്കെയ്നുമായിരുന്നു. എക്സൈസ് സംഘം കൊടുങ്ങല്ലൂരിലെത്തി ഇയാളെ ചോദ്യം ചെയ്തപ്പോള് ലഹരി ഉപയോഗിക്കാറുണ്ടെന്നും പാഴ്സല് തന്റേതല്ലെന്നുമാണ് മൊഴി നല്കിയത്. ജാസിം സമാനമായ പാഴ്സല് മൂന്ന് തവണ എത്തിച്ചിട്ടുണ്ടെന്ന് തൊട്ടടുത്ത പോസ്റ്റ് ഓഫീസില് നിന്ന് വിവരം ലഭിച്ചു. വീട്ടില് നിന്ന് കഞ്ചാവ് വലിക്കുന്ന സാധനങ്ങള് കണ്ടെടുത്തതോടെ കസ്റ്റഡിയിലെടുത്ത് കൊച്ചിയിലേക്ക് കൊണ്ടുവന്നു.
വിശദമായ ചോദ്യം ചെയ്തെങ്കിലും ജാസിം ആദ്യമൊഴിയില് തന്നെ ഉറച്ചുനിന്നു. ഇതിനിടെ ഇടപാടുകാരന് വിളിച്ചതോടെ ഇയാള് പ്രതിരോധത്തിലാകുകയും എല്ലാം തുറന്നുപറയുകയുമായിരുന്നു. ബുധനാഴ്ച രാത്രി അറസ്റ്റ് രേഖപ്പെടുത്തി. ഇന്നലെ കോടതിയില് ഹാജരാക്കി റിമാന്ഡ് ചെയ്തു. ജാസിമിനെ കസ്റ്റഡിയില് വാങ്ങി ചോദ്യം ചെയ്യും.
അസി.എക്സൈസ് കമ്മിഷണര് ടെനിമോന്റെ നേതൃത്വത്തില് എക്സൈസ് ഇന്സ്പെക്ടര് എം.എസ്. ഹനീഫ്, അസി. എക്സൈസ് ഇന്സ്പെക്ടര് രാമപ്രസാദ്, പ്രവിന്റീവ് ഓഫീസര്മാരായ സത്യനാരായണന്, രമേഷ്, ഋഷികേശ്, സിവില് എക്സൈസ് ഓഫീസര്മാരായ രാജേഷ്, സൗമ്യ, ബദറുദ്ദീന് എന്നിവരുണ്ടായിരുന്നു.
ലഹരി വരും, ഇറ്റാലിയന് ’അങ്കിള്’ വഴി
കൊച്ചി: കൊച്ചിയില് ഫോറിന് താപാല് ഓഫീസ് വഴി മയക്കുമരുന്ന് കടത്തിയ കേസില് അറസ്റ്റിലായ കൊടുങ്ങല്ലൂര് സ്വദേശി ജാസിമിന് (29) ലഹരി പാഴ്സല് അയച്ചത് ഇറ്റലി സ്വദേശി. മണാലി യാത്രയ്ക്കിടെ പരിചയപ്പെട്ട ഹിമാചല് സ്വദേശി പിങ്കു വഴിയാണ് ജാസിം ഇറ്റലിക്കാരനെ പരിചയപ്പെട്ടത്. ’അങ്കിളെ’ന്ന പേരിലാണ് ഇയാള് അറിയപ്പെടുന്നത്. പിങ്കുവാണ് ഇയാളുടെ ഇന്ത്യയിലെ പണമിടപാട് നിയന്ത്രിക്കുന്നത്. ’അങ്കിള്’ ഇറ്റലിയിലാണെന്നാണ് കരുതുന്നത്. ലഹരിമരുന്നിനായി പിങ്കുവിനാണ് ആദ്യം പണം കൈമാറുന്നത്. ഇയാള് അങ്കിളിന് അയയ്ക്കും. പണം കിട്ടിയാല് നെതര്ലന്ഡില് നിന്ന് ജാസിമിന് പാഴ്സല് വരും. പലരും ജാസിമിന്റെ അക്കൗണ്ടിലേക്ക് പണമിട്ടിട്ടുണ്ട്. നേരത്തെ വന്ന പാഴ്സല് തൊപ്പിയും മറ്റുമാണെന്നാണ് ജാസിമിന്റെ മൊഴി.
വിളിയില് വീണു ‘സാധനം കിട്ടുമോ, അത്യാവശ്യമാണ്…’ ചോദ്യം ചെയ്യലിനിടെ ജാസിമിന്റെ ഫോണിലേക്ക് എത്തിയ വിളിയാണ് അന്വേഷണത്തില് വഴിത്തിരിവായത്. ഇതേക്കുറിച്ചുള്ള ചോദ്യങ്ങള്ക്ക് മുന്നില് ജാസിമിന് പിടിവിട്ടുപോയി. തുടര്ന്ന് ലഹരി ഇടപാട് തുറന്ന് പറയുകയായിരുന്നു. സിനിമാ മേഖലയുമായി ബന്ധപ്പെട്ട് പ്രവര്ത്തിക്കുന്ന ആളുടെ വിളിയാണ് ജാസിമിന്റെ ഫോണിലേക്ക് എത്തിയത്. ജാസിമില് നിന്ന് ലഹരി വാങ്ങിയാണ് ഇയാള് സിനിമാ മേഖലയിലുള്ളവര്ക്ക് നല്കിയിരുന്നത്. ഇയാളെ ചോദ്യം ചെയ്യും. ജാസിമിനും സിനിമാ ബന്ധമുണ്ട്.
നെതര്ലന്ഡ് ലഹരി നെതര്ലന്ഡില് നിന്ന് മയക്കുമരുന്ന് പാഴ്സലായി എത്തിച്ച് വില്പന നടത്തുന്ന സംഘം സംസ്ഥാനത്ത് സജീവമാണ്. നിരവധി കേസുകള് എക്സൈസും കസ്റ്റംസും ഇതിനകം രജിസ്റ്റര് ചെയ്തിട്ടുണ്ട്. കഴിഞ്ഞ മാര്ച്ചില് കൊച്ചിയില് മൂന്ന് പേര് ഇത്തരത്തില് ലഹരി കടത്തിയതിന് അറസ്റ്റിലായിരുന്നു. ഇതില് ഒന്ന് നെതര്ലന്ഡില് നിന്ന് എത്തിയതായിരുന്നു.