ന്യൂഡല്‍ഹി/റിയാദ്: പൊലീസ് ക്ലിയറന്‍സ് സര്‍ട്ടിഫിക്കറ്റിന് (പി.സി.സി) ഇന്ത്യയിലെ മുഴുവന്‍ പാസ്പോര്ട്ട് സേവാകേന്ദ്രങ്ങളിലും അപേക്ഷിക്കാം.
രാജ്യത്തെ മുഴുവന്‍ പോസ്റ്റ് ഓഫിസ് പാസ്പോര്ട്ട് സേവാ കേന്ദ്രങ്ങളിലും ഓണ്‍ലൈനായി അപേക്ഷിക്കാന്‍ കഴിയുന്ന സംവിധാനം നാളെ (ബുധനാഴ്ച) മുതല്‍ ആരംഭിക്കും.
ഇന്ത്യയിലുടനീളമുള്ള എല്ലാ ഓണ്‍ലൈന്‍ പോസ്റ്റ് ഓഫിസ് പാസ്പോര്ട്ട് സേവാ കേന്ദ്രങ്ങളിലും (പി.ഒ.പി.എസ്.കെ) പി.സി.സി സേവനങ്ങള്‍ക്ക് അപേക്ഷിക്കാനുള്ള സൗകര്യം ഉള്‍പ്പെടുത്താന്‍ തീരുമാനിച്ചതായി വിദേശകാര്യ മന്ത്രാലയം അറിയിച്ചു. പാസ്‌പോര്‍ട്ടുമായി ബന്ധപ്പെട്ട സേവനങ്ങള്‍ ഉപയോഗിക്കുമ്ബോള്‍ പൗരന്മാര്‍ക്ക് മെച്ചപ്പെട്ട അനുഭവം പ്രദാനം ചെയ്യാനാണ് ഈ നടപടിയെന്നും വാര്‍ത്താക്കുറിപ്പില്‍ പറഞ്ഞു.
വിവിധ കാര്യങ്ങള്‍ക്കായി പൊലീസ് ക്ലിയറന്‍സ് സര്‍ട്ടിഫിക്കറ്റുകളുടെ ആവശ്യം അപ്രതീക്ഷിതമായി കുതിച്ചുയര്‍ന്ന സാഹചര്യത്തിലാണ് പരിഹാരമെന്ന നിലയില്‍ ഈ സംവിധാനം ഏര്‍പ്പെടുത്തുന്നതെന്നും സെപ്തംബര്‍ 28 മുതല്‍ രാജ്യത്താകെ സൗകര്യം ലഭിക്കുമെന്നും അധികൃതര്‍ വ്യക്തമാക്കി.
പി.സി.സി അപ്പോയിന്റ്‌മെന്റ് സ്ലോട്ടുകളുടെ എണ്ണം ഗണ്യമായി ഉയരുകയും കുറച്ചുകൂടി നേരത്തെയുള്ള തീയതിക്ക് ബുക്ക് ചെയ്യാന്‍ സാധിക്കുകയും ചെയ്യും. അപേക്ഷിക്കുന്നവര്‍ക്കെല്ലാം എളുപ്പം നടപടികള്‍ പൂര്‍ത്തീകരിക്കാന്‍ ഇത് സഹായിക്കും. വിദേശത്ത് തൊഴില്‍ തേടുന്നവര്‍ക്ക് മാത്രമല്ല വിദ്യാഭ്യാസം, മറ്റ് വിസകള്‍, എമിഗ്രേഷന്‍ എന്നിവക്ക് പി.സി.സി ആവശ്യമായി വരുന്നവര്‍ക്കും ഗുണം ചെയ്യുന്നതാണ് പുതിയ സംവിധാനം.
