ഹൈദരാബാദ്: തെരഞ്ഞെടുപ്പ് നടക്കുന്ന സ്ഥലങ്ങളില് പ്രധാനമന്ത്രിക്ക് മുന്പേ എന്ഫോഴ്സ്മെന്റ് ഡയറക്ടറേറ്റ് എത്തുന്നുവെന്ന് തെലങ്കാന നിയമസഭാംഗവും മുഖ്യമന്ത്രി കെ ചന്ദ്രശേഖര റാവുവിന്റെ മകളുമായ കെ കവിത.
ഡല്ഹി മദ്യനയത്തെ കുറിച്ചുള്ള അന്വേഷണവുമായി ബന്ധപ്പെട്ട് കോടതിയില് സമര്പ്പിച്ച റിപ്പോര്ട്ടില് ഇ.ഡി കവിതയുടെ പേര് പരാമര്ശിച്ചതിനു പിന്നാലെയാണ് പ്രതികരണം.
“ഏത് കുട്ടിക്കും അറിയാം മോദി എത്തുന്നതിനു മുന്പ് ഇ.ഡിയെത്തുമെന്ന്. പ്രധാനമന്ത്രി മോദിക്ക് വേണമെങ്കില് എന്നെ ജയിലില് അടയ്ക്കാം”- കവിത വ്യക്തമാക്കി. തന്റെ പാര്ട്ടിയായ തെലങ്കാന രാഷ്ട്ര സമിതി (ടിആര്എസ്) നേതാക്കള്ക്കെതിരായ ഇ.ഡി, സി.ബി.ഐ കേസുകള് തരംതാഴ്ന്ന രാഷ്ട്രീയത്തിന്റെ ഭാഗമാണെന്നും കവിത പറഞ്ഞു.
“നിങ്ങളുടെ കേന്ദ്ര ഏജന്സികളെ ഉപയോഗിച്ച് തെരഞ്ഞെടുപ്പില് വിജയിക്കാന് കഴിയില്ല. എട്ട് വര്ഷത്തിനിടെ ബി.ജെ.പി ഒന്പത് സംസ്ഥാന സര്ക്കാരുകളെ അസ്ഥിരപ്പെടുത്തി. കെ.സി.ആര് നയിക്കുന്ന സംസ്ഥാന സര്ക്കാരിനെ അസ്ഥിരപ്പെടുത്താന് ബി.ജെ.പി ഗൂഢാലോചന നടത്തുകയാണ്. കേന്ദ്ര ഏജന്സികളെ ഉപയോഗിച്ച് അപകീര്ത്തിപ്പെടുത്തുകയാണ്. എന്നാലും കേന്ദ്ര ഏജന്സികളെ സ്വാഗതം ചെയ്യുന്നു. അവരുമായി സഹകരിക്കും”- കവിത വിശദീകരിച്ചു.
ആം ആദ്മി പാര്ട്ടിക്ക് കൈക്കൂലിയായി 100 കോടി രൂപ നല്കിയ സൌത്ത് ഗ്രൂപ്പിലെ പ്രധാനിയാണ് കവിതയെന്നാണ് ഇ.ഡിയുടെ കണ്ടെത്തല്. ഡല്ഹി മദ്യനയ കേസുമായി ബന്ധപ്പെട്ട് അറസ്റ്റിലായ വ്യവസായി അമിത് അറോറയുടെ റിമാന്ഡ് റിപ്പോര്ട്ടിലാണ് കവിതയെ കുറിച്ച് പരാമര്ശമുള്ളത്.