മസ്കത്ത്: ബുറൈമി ഗവര്‍ണറേറ്റിലെ മഹാദ വിലായത്തിലെ അല്‍റൗദയില്‍ ‘സാമ്ബത്തിക മേഖല’ (ഇക്കണോമിക് സോണ്‍) സ്ഥാപിക്കുന്നതുമായി ബന്ധപ്പെട്ട് മന്ത്രിമാരും ഉദ്യോഗസ്ഥരും സ്ഥലം സന്ദര്‍ശിച്ചു.
സുല്‍ത്താന്‍ ഹൈതം ബിന്‍ താരിഖിന്‍റെ നിര്‍ദേശത്തെതുടര്‍ന്നാണ് ഇവിടെ സാമ്ബത്തിക മേഖല ഒരുങ്ങുന്നത്. ഹെലികോപ്ടറില്‍ എത്തിയ സംഘം അല്‍ റൗദ പൊലീസ് സ്റ്റേഷനില്‍ നടന്ന യോഗത്തില്‍ പങ്കെടുത്തു. കേണല്‍ സെയ്ഫ് റാഷിദ് അല്‍ കല്‍ബാനി അല്‍ റൗദയെയും സമീപ പ്രദേശങ്ങളുമായി ബന്ധിപ്പിക്കുന്ന റോഡുകളെ കുറിച്ച്‌ വിശദീകരിച്ചു.
കാര്‍ഷിക മേഖലയില്‍ നിക്ഷേപം നടത്താന്‍ നിര്‍ദേശിച്ചിട്ടുള്ള സ്ഥലങ്ങളും സംഘം സന്ദര്‍ശിച്ചു. ഈ മേഖലയില്‍ പ്രവര്‍ത്തനങ്ങള്‍ സജീവമാക്കുന്നതിനുള്ള നിര്‍ദേശങ്ങള്‍ ഉദ്യോഗസ്ഥര്‍ വിശദീകരിക്കുകയും ചെയ്തു. അല്‍ റൗധ ബോര്‍ഡര്‍ പോസ്റ്റ് (ബി) സന്ദര്‍ശിച്ച സംഘം കസ്റ്റംസുമായി ബന്ധപ്പെട്ട വിഷയങ്ങളും ചര്‍ച്ച ചെയ്തു.
ധനകാര്യ മന്ത്രി സുല്‍ത്താന്‍ സലിം അല്‍ ഹബ്സി, പ്രത്യേക സാമ്ബത്തിക മേഖലകള്‍ക്കും ഫ്രീസോണുകള്‍ക്കുമുള്ള പബ്ലിക് അതോറിറ്റി ചെയര്‍മാന്‍ ഡോ. അലി മസൂദ് അല്‍ സുനൈദി (ഒപാസ്), കൃഷി, ഫിഷറീസ്, ജലവിഭവ മന്ത്രി ഡോ. സൗദ് ഹമൂദ് അല്‍ ഹബ്സി, ഭവന, നഗരാസൂത്രണ മന്ത്രി ഡോ. ഖല്‍ഫാന്‍ സഈദ് അല്‍ ഷുവൈലി, സാമ്ബത്തിക മന്ത്രി ഡോ. സഈദ് മുഹമ്മദ് അല്‍ സഖ്‌രി എന്നിവരാണ് സന്ദര്‍ശക സംഘത്തിലുണ്ടായിരുന്നത്. ബുറൈമി ഗവര്‍ണര്‍ സയ്യിദ് ഡോ. ഹമദ് അഹമ്മദ് അല്‍ ബുസൈദി, മഹാദയിലെ വാലി ശൈഖ് അബ്ദുല്ല സലിം അല്‍ ഫാര്‍സി, ഗവര്‍ണറേറ്റിലെ ഉദ്യോഗസ്ഥര്‍ എന്നിവരും സംബന്ധിച്ചു.
